ព្រះសីហនុ៖ កំពង់ផែទេសចរណ៍ខេត្តព្រះសីហនុដែលបានទុកចោលជាយូរមកហើយ ត្រូវបានកែប្រែឡើងវិញ និងបានដាក់ឱ្យប្រើប្រាស់ជាផ្លូវការនៅថ្ងៃទី០៧ ខែកក្កដា ឆ្នាំ២០២៣ ក្រោមអធិបតីភាពរដ្ឋមន្ត្រីក្រសួងទេសចរណ៍ លោក ថោង ខុន។

ប្រធានសមាគមភ្នាក់ងារដឹកជញ្ជូនទេសចរណ៍ជលយានខេត្តព្រះសីហនុ ឧកញ៉ា ទៀ វិចិត្រ បានប្រាប់ឱ្យដឹងថា កំពង់ផែទេសចរណ៍ខេត្តព្រះសីហនុនេះអាចអនុញ្ញាតឱ្យអូប័រទេសចរណ៍តូចធំចំនួន ២០គ្រឿងចតក្នុងពេលតែមួយ និងជាចំណតដ៏មានសុវត្ថិភាពសម្រួលដល់ការធ្វើដំណើររបស់ភ្ញៀវទេសចរទាំងជាតិ និងអន្តរជាតិ។ តាមរយៈកំពង់ផែទេសចរណ៍នេះក៏នឹងអាចជួយលើកស្ទួយដល់វិស័យទេសចរណ៍តាមបណ្តាកោះក្នុងខេត្តព្រះសីហនុផងដែរ។

បើតាមឧកញ៉ា ទៀ វិចិត្រ ការវិនិយោគលើកំពង់ផែទេសចរណ៍ខេត្តព្រះសីហនុនេះនឹងធ្វើឱ្យមានភាពល្អប្រសើរឡើងក្នុងការទទួលបដិសណ្ឋារកិច្ចភ្ញៀវទេសចរគ្រប់ជាតិសាសន៍ ដែលបានធ្វើដំណើរមកពីបណ្តាប្រទេស នានាទូទាំងសកលលោក។

រដ្ឋមន្ត្រីក្រសួងទេសចរណ៍ លោក ថោង ខុន បានលើកឡើងថា កំពង់ផែទេសចរណ៍ដែលតភ្ជាប់ទៅតាមកោះនានាក្នុងខេត្តព្រះសីហនុនេះក៏នឹងអាចជួយទាក់ទាញភ្ញៀវទេសចរជាតិនិងអន្តរជាតិមកកម្សាន្តលេងនៅខេត្តព្រះសីហនុកាន់តែច្រើនបន្ថែមទៀតដើម្បីរួមចំណែកជាមួយរាជរដ្ឋាភិបាលក្នុងការបង្កើតឱកាសការងារជូនដល់ប្រជាពលរដ្ឋ។

អភិបាលខេត្តព្រះសីហនុ លោក គួច ចំរើន បានស្នើសុំការគាំទ្រពីរដ្ឋមន្ត្រីក្រសួងទេសចរណ៍ លើកការរៀបចំកំពង់ផែទេសចរណ៍ខេត្តព្រះសីហនុ ទៅជាកំពង់ផែទេសចរណ៍អន្តរជាតិ ដើម្បីធ្វើការផ្លាស់ប្តូរភ្ញៀវទេសចរមកពី ថៃ និងវៀមណាម និងលំហូរពីបណ្តាប្រទេសដ៏ទៃទៀតឱ្យមានការផ្លាស់ប្តូរទេសចរទៅមកផងដែរ។

ជាមួយគ្នានេះលោក គួច ចំរើន ក៏បានអះអាងថា នាពេលកន្លងមកខេត្តព្រះសីហនុមិនទាន់មានកំពង់ផែទេសចរណ៍ខ្នាតអន្តរជាតិនៅឡើយទេ ដោយលោកគ្រោងស្នើសុំរាជរដ្ឋាភិបាល ដើម្បីរៀបចំកំពង់ផែនេះឱ្យក្លាយជាកំពង់ផែខ្នាតអន្តរជាតិនាទឹកដីក្រុងព្រះសីហនុនាពេលខាងមុខ៕